حجي شنيور والمجهر

طبيت العياده واذا بحجي ‫#‏شنيور‬ محنب على المجهر وعينه بس عوزها تلزك بيه
* ها حجي شنيور شنو صاير محلل ؟
* ...
* حجي شنو السالفه ما تسمع ؟
* عمي دريض شويه .. ما شوفني مركز ؟
* هسه انت اشجابك عله هلشغله .. شجاي ادور ، فايروسات لو جراثيم ؟
* جاي ادور علفاسدين
* جا شنو الفاسدين شنهي .. ميكروبات ؟
* عمي راح يخبلني التلفزيون .. رؤساء الكتل يدورون علفاسدين ، الوزره ايدرون علفاسدين .. الاحزاب يدورون علفاسدين .. الشعب يدور علفاسدين .. انه شفت هذا المهجر وكلت راح احل اللغز واشوف الفاسدين الما عرفتهم هاي الوادم كلها ..
* عمي اسمه المجهر مو المهجر ..
* خايب دولي وخليني اشوف شغلي .. علاساس كل حجيكم اله معنه عمي شو تخيطون وتخربطون .. شريفكم حرامي وحراميكم شريف وتاهت السالفه
* في مالاه حجي
* دفعة مردي

‫#‏العم_هلكان‬

الاصلاح والحث

تمخض " الاصلاح " فولد " حثا "
حث عيني حث
مرخوص بالاصلاح بس كونك تحث
كل للحرامي مروتك
حث ربعك عله البوك لا تجبس جبس
خلها ابمناصف للشعب
مو شفط والعالم تحس
حثهم الى ان تنحمس
حث عيني حث
ما عاش الا المستحث

‫#‏العم_هلكان‬

حجي شنيور والتوثيه

جاي امشي في الشارع واذا بحجي ‫#‏شنيور‬ لازم له توثيه او ياهو الواكف يحمسه بيها
* هاي شبيك حجي .. شنهي تخبلت ؟
وجان يهفني بتوثيه وانه طفرت عنه
* حجي .. صلي على نبيك .. شبيك جنك ثور هايج ياهو الكبالك اتنطحه ؟
* خايب انجب .. تريدون تاخذون الثوده اللي ما جنه مصدكين وااحد من عدنه يشوفها ابعينه وتريد نسكت
* حجي جا غير ديمغراطيه ؟
* خايب دولي .. ديمغراطيه اذا بس تلغون وفق قاعدة ضراط الما ينفه .. اما اذا وصلت لميلاتنه ماكو عدنه غير توثي قراطية .. يله امشي بعد ما كو ديمقراطيه .. خلصنه .. بح
‫#‏العم_هلكان‬

حوار قناة " الشعب الدايخ " مع الحاج شنيور

حوار اجراه مراسل قناة " الشعب الدايخ " مع الحاج شنيور
المراسل / مرحبه حجي شنيور
شنيور / هله عمي هله
المراسل / شنو رأيك بالمظاهرات ؟
شنيور / يا مظاهرات ؟
المراسل / المظاهرات ضد الفساد
شنيور / هو منو الفاسد ؟
المراسل / اشخاص بالحكومه والاحزاب
شنيور / لازم نقضي علفساد
المراسل / السيد رئيس الوزراء سوه حزمه من الاصلاحات
شنيور / جاهو مو من الاحزاب ؟
المراسل / اي .. بس هو استجاب لمطالب الشعب
شنيور / لازم نعرف اسباب الفساد .. هو لغه ادستور والمحاصصة ونظرية المكونات ؟
المراسل / لا بس طير نواب رئيس الجمهوريه ونوابه و..
شنيور / المسكنات اطيب البي سرطان ؟
المراسل / لا ..
شنيور / جا هو الاساس اللي سوه الفساد ذني الثلاثه .. جا اسوينه بله ؟
وهنا اعتذرت قناة " الشعب الدايخ " عن انقطاع البث من المصدر
‫#‏العم_هلكان‬

الله يخرب كيزركم

* الله يساعدك عمي ، ممكن اسعلك سوعال ؟
* تفضل حجي شنيور
* اشخبار اصحابك جماعة ؛ اووي الله يخرب كيزركم ؟
* حجي ذوله مو جماعتي .. بس همه ناس حضاريين وعدهم اتيكيت وعيونهم ناعسه وما يحبون الناس التفشر واسب
* لا بروح ابوك .. ختيه .. جا الينهبك ويبوكك وينعل سلفه سلفاك وغاسل عينه ابوله ، يسوي المكسوره والشينه ويطلع يتلمظ ولا جنه مسوييها .. شتكله ؟ اوي الله يخرب كيزركم عمو الحباب ؟ لو يرشكه بشريط مال سباب وفشاير يليق بمقامه التعيس
* لا حجي انت مو حضاري للكشر .. شنو انت ما وصلتك الديمقراطيه والرأي والرأي الاخر والعلاقه الاسفنجيه بين المشاعر والشعور الكامن في الانجراح اللاواعي في بوتقة الامم والشعوب ..
* تروح تجفيني شرك لو امسدك بعكال ايطلع حليب امك من خشمك ..
هو حط ايده علعكال وانه صرت غزال وصبحت بطويريج ...
‫#‏العم_هلكان‬

حجي شنيور .. والمظاهره

حجي شنيور .. يشرب جكاره وره جكاره ..
* ها عمي اجيتو من المظاهره ؟
* اي عمي
* شهتفتو ؟
* هتفنا ضد الفساد والموفسدين وهمه هم جماعتهم ويانه يهتفون
* وفرحان مو .. الغسل الطمكم جا اذا همه وياكم جا المظاهره عليمن ؟
اجيت اشرحله علتكتيك ولم الشمل والمظاهره مو مال ابو واحد بس خفت لان حط ايده عله عكاله ههههه الله لايراويكم وحده من مسداته ..
* هاي وين صفنت .. هتفتو ضد السفاره الجبيره ؟
* لا عمي جا السفاره شله غرض .. احنه حصلنه الاستقلال
* ولك لشوكت اظلون ازواج .. ما يصير شي الا ابأمر السفاره ..
حطه ايده على عكاله وانه اطيتها اللهيب
جا منهو باكك يا شعب ؟!
كلها تكول احنه وياك
‫#‏العم_هلكان‬

حول التظاهرات المطلبية في العراق

نعم .. التظاهر والاحتجاج شرط رئيس لأي مجتمع يريد التطور وانتزاع حقوقه .. حراك واحد قد يعلم الجماهير افضل من موسوعة ولكن ؛ لنأخذ الحراكات الواسعه فيما سمي " بالربيع العربي " واكتفائها بشعارات جميلة جذابه ، انتهت بالتحول الى هيمنة القوى الفاشية الظلامية وتدمير المجتمعات .. من خلال هذه التجربة الماثلة نستنتج ان نقص البرنامج المحدد والواضح لأي تحرك يمكن ان يؤدي الى عكسه ، وان عدم تشخيص الاسباب الحقيقية للازمة ووضع اهداف وآليات حقيقية لحلها قد تؤدي الى مآلات اخرى عكسية ، وتستغل لمصالح قوى تستغل الازمة لتفرض حلا فاشستيا .. في الاستقطاب الحاد لا حلول وسط .. اما انتصار اهداف الشعب او الفاشية . على الحراك الشعبي الحالي ان يجيب على هذه الاسئلة المهمة ويحدد على مستوى وطني رؤيته ، وليس انغمارا في الية الخراب الفدرالية ومصالح دويلات المدن مما يساعد على تفتيت البلاد وتحقيق الية عمل السلطة التي يناهضها
‫#‏العم_هلكان‬