خرطوطه

الله بالخير
فد خرطوطه _ مصطلح تم نحته من المصدر خريطي _ نيو لبراليه شائعة ، احنه اشحصلنه من الثورات ددددد .. الخ خل نرتاح مثل العالم ! نسو ان تطور اوربا نشأ بعد الثورة الفرنسية التي تسببت بالاطاحة بكل الحكومات الاقطاعية ، وان الثورة الامريكية على الاستعمار البريطاني قد انتجت الولايات المتحده الامريكية بزرها ، وكذلك ثورة اكتوبر العظمى التي جعلت مطلب العدالة الاجتماعية يجول العالم شبحا يرعب المستغلين .. جبناها على الثورات العالميه بس ، وانتم بكيفكم
ثيمالله
#خرطوطه
#نيولبراليه
مع تحيات عمكم
#العم_هلكان

الوعي راكد

الله بالخير ..
يكلك وينها كرونا فلم سوته الحكومه حتى تقضي علمظاهرات ، مو هاي امريكا جاي يطلعون مظاهرات ..
* ينشر الكثير من المواطنين نعيهم لمن رحل بالكرونا وتعرف انت ناس من وادمك ديموتون او ينصابون ، والاخ يريدك اصدك تنظيره ماكو كرونا
* امريكا ماتو بالكرونه 110000 والحبل علجرار يمكن انتلو بالكهرباء وماتو
* المظاهرات الطلعت بهل الاتساع من اسبابها الرئيسية كورونا واستهتار ترامب بمعالجتها حيث
- اكثر المصابين من السود اللي نسبتهم 12% من السكان
- اكثر من 40 مليون عاطل بسببها
- ناس كثيره ليس لديها اموال لمواجهة الحياة الصعبة والعلاج
كل هاي انماط التفكير عدنه وتتعجب شلون انخطفت الانتفاضه ؟! عمي الوعي_راكد الله وكيلك
ثيمالله
#العم_هلكان

عصر التفاهه

الله بالخير
قامت امريكا ، وبأمر من ترامب ، بحرق مزارع الحنطة في سوريا .. الشعوب الفيسبوكيه سكته يم حسن سكته ، والدنيا فاكه اربع ويلات ومتربعه ، وحته اذا واحد نشر الخبر محد ايكله السلام عليكم !
- تحترق حقول الحنطه في العراق وهي هاضت المنشورات ! ايران حركت الحنطه ، ماتريد العراق يتطور ودددد مثل العجوز الماكلين عشاها وظل ادردم ، يابه تره احنه نستورد الحنطه من استراليا وامريكا وروسيا خل اندور الفاعل الحقيقي ؟
- راسا وتكب عليك العيطه ، انت ادافع عن ايران الاحتلت ارضنه ، ووو وما تخلص بريشاتك
- يابه انعل ابو كلمن احتل ارضنه ، لابو عشيرته اي كان ، جا امريكا أسوت بردت ، قصدي حررت ، ارضنه اشو مغلس عنها ؟ كلعاده سكته يم حسن سكته
الشيء بالشيء يذكر .. الكهرباء جاي تنكطع وابو المولده مغلس ، عمي جانتم حولان ؟ متكولون ايران السبب وسوو ثوره ، انتفاضه ، عصيان مدني مو كتلنه الحر
المهوم ، امانه بركبة كلمن يعرف هذا الفيلسوف الالف كتاب عصر التفاهة يبوسلياه من راسه ويكله هاي البوسه من عمك هلكان لان بس انت عرفت السبب .. ثيماالله
#العم_هلكان

الطريقة الابو طبرية في ترويض البريه

الله بالخير ..
منو من الشياب ربعي يذكر اول ما اجو البعثيه للحكم ، بثمانيه وستين من القرن المرحوم ومن عدها اشتغلت رحمة الله ، وليومك ، لنجاعتها في " تحويل النمور الى خرفان والقفص الى مدينه " حسب رواية زكريا تامر ، رضي الله عنه ،.. يوم ماكو معجون وكبت العيطه ، وادى ذلك الى احتفال السمج بعد ما ملت الوادم ، لا معجون لا نفط لا غاز فاضطرت الوادم اذب السمج بالشط وكام يهوس ، هلهوله للبعث القائد . نوبه الحنطه المسمومه ، نوبه عدنان القيسي والعكسيه والزعاطيط مطافر وكلساع واحد طايح ومكسوره ايده . انوب ابو طبر والعراق يرجف من زاخو الى الفاو وتالي طلع ابو طبر وي اخوه واخته يمكن ، ماينطلع بيهم للسوك . انوب اجه الاحتلال وياطلابة البعثية الماتخلص ويومية مطلعيلك سالفه واجاك الذيب واجاك الواي ، نوبه القاعده ، تالي كلبوها علبطانه وصارت داعش ، من غير طنطل الفساد العيونه بالطول .. تعلمنه وكمنه نحس بالفراغ اذا ماكو سالفه غبره نسولف بيها .. هسه بعد ما طلعت ارواحنه من سالفة النبك طلعتنه سالفة العلم وعلى هالرنه طحينج ناعم !
شوف عمي انت ما سامع بالحكمه ، لاتكن قشمرا فتركب ! ثيمالله
#العم_هلكان

رجع ابو المقاوله

الله بالخير ..
على كولة القس توتو كالونه الغزاة غمضو عيونكم وادعو لله ، فكينه عيونه لكيناهم ماخذين الارض وتاركينه الانجيل ! اروع تعبير عن طبيعة الاستعمار وغاياته .. المهم احنه جان عدنه طاغية درجه اولى جزع الوادم ابطلايبه وقمعه لحد ما كرهت الوادم حتى نفسها ولهنا صرخت امريكا وكالت عده سلاح شامل وراح يدمر الوادم ، هههه امريكا العفيفه اللي هي الوحيده الاستخدمت القنبله الذريه ومسحت مدينتين باليابان كاتله الناس وخايفه عليهم من السلاح النووي ! ههههههه واحنه صدكنه وناشدنه الموشتمع الدولي يخلصونه .. امريكا كالت خوش وراحت للدول الحكو عده اسلحه " ممنوعه دوليا " هههه وهاي اسرائيل ابصفنه عدها فوك الميتين راس نووي فنه اليجيب طاريها ! الدول كالت الهم يمعودين مو نبشنا البلد نبش كلشي مالكينه اكعد راحه ابو درب .. شسوه ؟ كام يصرخ الحريه للشعب العراكي وياها دسته من حقوق الانسان والديمقراطيه ووو .. فد تشكيله اللي تعجبك ، وهم هوست الوادم وكام تعوج حلكها ونست تشرين ونست اتنيسن وياج اخذيني وكام اصيح ثوار اكتوبر ، المهم طبو على جماجم الشعب العراقي وملايين القتلى والجرحى والمقودين والمهجرين والمهاجرين ، ومليارات الدولارات التبخرت وما نعرف شظل من كاعنه ونفطاتنه ومياهنا المهم عدنه انتخابات مال سوك مريدي !
السالفه وما بيها يبعد عمكم ابو المقاوله الاصلي ابو الحريه للشعب العراكي رجع يشتغل الشغل بيده ويوخر قسم من المقاولين الثانويين ويحط مقاولين جدد لما يكملون نهيبتكم وانتو ظلو مجلبين بقشمرية الانتخابات .
ثيمالله
#العم_هلكان

الفزعه ظاهرة عراقية متأصلة

الله بالخير
في اواخر ستينيات القرن المرحوم السابق ، حدث في مدينتي ، حريق سوق النجاجير ، وهو في السوق الرئيسي للمدينه ، يعني اصور سوق كله خشب يحترق ممكن يحرق السوق كله ..كنت متمدد على فراشي واريد انام ، فوك السطح ، واذا باصوات صارخة تولل وهلاهل عالية ، وهي علامة الانذار بوجود حريق ابتكرتها العقلية الشعبية الرائعه ، وهي علامة التمييز بين علامة الوفاة وعلامة العرس ،
فتحت عيوني لارى السماء كتلة من لهب فخرجت حافيا وبنص هدوم ، راكضا باتجاه الحريق فدهشت لحجم الحضور : هاي شوكت اجو لان ييتي الاقرب الى السوق ؟ ! كانت ملحمة بحق ؛ سروات من البشر يحملون سطوله من الشط الى السوق ، حيث كان السوق مطلا على النهر ، وهم يرشونهه ليعودوا الى ملئه من جديد ومظاهر بطوليه لا حصر لها واستبسالا في الوصول الى المناطق التي يصعب الوصول اليها . ما اطول عليكم بذاك الوكت الدوله ما عدها امكانات فاستدعت سيارات الاطفاء من المدن القريبة وكم كانت دهشتهم عندمت وجدوا الناس قد اطفأت هذا الحرق الضخم بادواتها البسيطه .
رباط السالفه عمي اللي طلعو بيهم الشريف وبيهم المكسر ، بيهم البعثي وبيهم الشيوعي وبيهم الاسلامي وبيهم جماعة البار وبيهم جماعة الجامع ، بيهم اليدور بنات وبيهم من يشوف المره عينه ادك بالكاع . يعني الفزعه بدم العراقي من ايام السومريين ، فعاد خل نخجل شويه من المهاترات والمعايير ، بينات اليوزعون معونة الكورونه ، هم هاي سويتوهه محاصصه ؟ خصم الحجي عمي هاي ظاهره عراقيه اصيله واللي يسويها لمنافع خاصه هذا لو مو عراقي ، لو فاصخ عراقيته ونبقه نكول : الله يطيح حضج امريكا .
ثيمالله
#العم_هلكان

بتاع كلو

الله بالخير ..
ذكرتني ، الاحداث ، بنكته من ايام ذاك الزمان ، يكلك فد واحد سأل صديقه الكردي : ها وين كاكا متنشاف هلايام ؟ فجاوبه : والله مشغول كاكا الصبح دوام ، والعصر جيش شعبي ، وبالليل بيشمركة .. مشكلة العراق السياسيين يمثلون كل الادوار وبمهاره .. همه حكومه وهمه معارضه ، همه ضد الاحتلال وهمه وياه ، همة مع المطالب الشعبيه وهمه ضدها ، همه وي المحاصصه وهمه وي الاصلاح ، همه ضد اسرائيل وهمه وياها ، تجي للانتفاضه همه نصهم بالساحه وهمه نصهم يكتلون بالمنتفضين ، همه يطالبون بحصر السلاح بيد الدوله وهمه يطالبون بحصر الدوله بيد السلاح ، ذوله سياسيين لو شنو ؟
اخلي الجواب يمكم انتو اجاوبوه وآنه اروح .. اودعناكم ،
ثيمالله
#العم_هلكان

بين الكورونا وابو علي الشيباني

الله بالخير
الكورونا ابجفه وابو علي الشيباني بجفه هههههه شفتله فديو وحده كالتله واحد من عائلتها طلع بالثمانين ومار جع كالها بعد ما اخذ خيره ومنو كالج طلع موجود بالعراق كالتله ما هو بايران واختفه كالها ها مو محيط البصره بعربستان تابع للعراق بالنسبه الي ههه ذكرني بهذا الكال ها الفيل يطير بس مو كلش عالي ..
يكلك والعهده على الراوي ، فد مره اجتماع حزبي بالجيش ، وتدري بالجيش المو حزبي يبتلي على روحه بزمن صدام ، المسعول سعل الرفاق الفيل يطير لو لا ؟ واحد عود على اساس نبه ، خبص الدنيا .. استاذ استاذ ، كاله الرفيق : احجي رفيق . كاله وين اكو فيل يطير رفيق ؟ الرفيق كاله انجب ولك ، القائد الضروره يقول يطير . النبه اذا ذبحه ما تلكه بي قطرة دم من الخوف .. كله رفيق هو يطير بس مو عالي ..
هسه الله يكون بعون العراقي النبيه لان يعيش بين منطق جماعة ابو علي الشيباني ، وبين منطق جماعة الفيل يطير
حماكم الله من الكورونات ، ثيمالا
#العم_هلكان

نفطنا ودمائنا

الله بالخير ..
لقد شقت احشاء الارض برعونه وبدون رحمة ، وانتزع حليبها الاسود بجنون ، فيما تراجع كل شيء في العراق يمت للحياة بصلة ، رغم الكم الهائل من الثروة التي لم يعرف صرفها بوضوح ، واين تذهب ! هاي القصة والباقي هرمله على ضفاف الرافدين وضحك على الذقون وقشمرلوغيه لم نمر بها حتى في الفترة المظلمة من التاريخ . شيئان يسيلان ويهدران :
#نفطناودمائنا
ثيمالله
#العم_هلكان

كعب اخيل

الله بالخير
كعب اخيل
القراءة للشياب فقط
اكو وحده كان اخوانه زغار وابوها رجال جبير ، وجانت تطلع ابمكانه اداري الزرع .. تسكيه وتعتني بيه .. البنيه جانت حلوه كلش . واحد من الشلايتيه جان عنده نيه سوده وياهه فجان يراقبها باطراف الكاع مالتهه وكلما يريد يقترب حطت ايدهه على الخنجر وسحبته يلهث وحاد يكص عظم البعير .. يوم من الايام تجرأ وتقرب منها وجان تسحب الخنجر وكالت له : ولك منعول الوالدين اشعدك تحوم هنا جنك واوي ؟ تروح لو اطشر مصارينك كدامك .. كالها يبت الحلال هسه غير تعرفين السالفه .. كلما ارد اكلك جريتي الخنجر . كالتله احجي سالفتك من يمك وفضها . كالها عمي نذرت لله ما صار الاريده ، ما خليت نبي ولا امام ما نذرتله هم ماكو فايده ، نذرت الج صار الاريده وهسه جاي اوفي النذر .. طلع خمس دنانير بذاك الوكت جانت تحجي ، وكلها نذرت انطيج خمس دنانير بس اشوف جعب رجلك ، بين قوسين كعب القدم .. صفنت هاي وكام تبرر لروحه : شكو بيها واذا شاف جعب رجلي ؟ نزعت دستة الجواريب وراوته جعب رجلها والرجال خله ومشه . غط كم يوم وكام يراقبها بدون ما تشوفه والبت عينهه عالدرب .. هذا ما نذر بعد ؟ اخونه اجاهه وكاللها عمي انتي ( سرك باتع ) هم نفس القوانه ولمن نذرتلج يله تحقق الاريده وهاي عشر دنانير بس اشوف ساقج للركبه .. المهم ما اطول عليكم السالفه والنتيجه مبينه .. هسه ولا احنه دوم تبدي عدنه من جعب الرجل ونغلس منا لمن ... والعياذ بلله ..
لابو جعب الرجل .. ولكم هذا طلع ( كعب اخيل ) .. انه اخوك هذ اخيل من يا عمام ؟.. هسه مو تنسون تره تبدي من جعب الرجل! مو تغلسون ؛ ثيمالله
#العم_هلكان

الفراغ الدستوري

الله بالخير ..
الله يرحم الزاير رجال فقير بس لوكي مال حزب البعث .. صارت الانتفاضة مال ال91 ، وهو معلك علمنظمة وره احادية واجت الجماهير تحاصر المنظمة فشافته .. كلوله زاير انت فقير وما عدنه شي وياك ، انزل وروح لاهلك جان يكلهم ما اجاني امر ورمه علناس فانكتل .. الجماعه يبين بعدهم ما جايهم امرولمن طحنه بالفراغ الدستوري .. يلله احسن الكم الفراغ وصرتو تعيشون مرحلة انعدام الجاذبيه ؟ عساكم بالفراغ ، ثيمالله
#العم_هلكان

القمع يعرقل التقدم ولكن لن يمنعه

الله بالخير ..
( جن لا لوليتي وربيتي ) هذه الاهزوجة من ايام ثورة العشرين التي اراد الثوار ابلاغ ام باستشهاد ابنها فكان جوابها الرائع : ( لوليت وربيت لهذا ) ..يعني ربيت ابني ليدافع عن الوطن ويستشهد في سبيله اذا اقتضى الامر .
قضية انتفاضة تشرين هليام مشابهة لهاتين الاهزوجتين ..فبعد كفاح مغرق بالدم طيلة شهرين تقريبا ، واوضاع خطيرة ظم عبد المهدي استقالته الى ان صار الد م للرجاب كما يقولون ليعلن استقالته " المشبوهة " وتعود الطبقة السياسية الى موالها القديم بمشاورات " الكتل " والكتلة الاكبر ونعيين رئيس الوزراء ولا كأن الشعب قد قال كلمته برفض هذه العملية " السياسية " واسسها والعودة كما كنا على مبدء ( جن لا لوليتي وربيتي )
لاعمي فقد سال بحر من الدم لن ينفع معه ذلك بل ينفع معه ( ربيت ولوليت لهذا ) اي الانصياع الى رغبة الشعب بالتغيير . كفى دما لايفعل شيئا سوى عرقلة حركة التاريخ ولكنه لن يمنعها .
ثيمالله
#العم_هلكان

اقالة الساعدي

الله بالخير ..
اليوم نسولف على قضية عزل الفريق الساعدي دون ان يكون الموضوع حول حيثياتها حتى نوفر الجهد ، وما ندخل بمتاهة عراقية في الحوار ، لا اول لها ولا اخر ، وبالتالي نضيع راس الوشيعه بعدما نلعب بطروكها لعب !
لايختلف اثنان عن قيادته لدحر داعش في الموصل ، وعسكريا يتحمل القائد الفشل والنجاح ، ولو بالعراق ما عدنه هيج قاعده حيث يكرم الخاسر باعتباره بطل ، وينزوي الناحج لاسباب لا يعلمها الا المسيرون للاحداث في العراق !
المهم هناك ظواهر تلفت الانتباه فقد ظهر امتنان اهل الموصل واضحا وصل الى اقامتهم تمثالا له ، انزلته الحكومة ! ودعم واضح في اجهزة التواصل الاجتماعي من كل فئات الشعب بعيدا عن الطائفية والمناطقية ! ماالذي يعني ذلك ؟ انه يعني شوق الناس الى رمز يريدونه وطنيا عراقيا أ وفشل واضح لصيغة المكونات التي زرعها الاحتلال ، وهذا هو سبب هذه الهوسه المثاره حول القضيه . يابه العراقيون يحاولون استعادة عراقيتهم التي قتلتها صيغة حكم المكونات . ثيمالله
#العم_هلكان

شوية كرامه

الله بالخير ..
عندما اذل فلاحو فيتنام امريكا عند احتلالها لبلدهم فيتنام ، لم يقل احد اكو ان بالموضوع ولم يشرقو او يغربو بل قالوا ، ببساطه ،ان احساس الشعب الفيتنامي بالكرامه ، وتصميمه ، وارادته هو الذي هزم امريكا .. اليمنيون الحفاة عندما يصعد احدهم علدبابة االامريكية او الانكليزية او الالمانية تبع ال سعود المتطوره وهو لابس نعال ابو اصبع ، ويفجر داخلها قنبلة يدوية ، تشتغل الجنجلوتيات وخفة دم الربع ، ومحاولة اثبات ما لا يمكن اثباته ، ويكتبون كل ما يمكنه التشكيك بالموضوع . ببساطة لن يفهم البطولة من لا تعني له الكرامة والاراده شيئا ..

ونختم بقول غوار الطوشي ، في احدى مسرحياته ،عندما خابره ابوه من الاخره ، يتفقد احواله : شو ناقصكم يابي ؟ فرد عليه : ما ناقصنه شي غير شوية كرامه ، يابي ..
ثيمالله
#العم_هلكان

مقامة الاثار ودماء الشهداء

سألت #العم_هلكان عن اللغط الكثير وتبلل الافكار الخطير الذي اعقب تفجير الحدباء من قبل الدواعش الجرباء ، بين الجموع ، ما بين متألم ومفجوع ، وبين فرح ملسوع فأجاب :
اعلم يا ولدي ان حالتكم تفرح الاعداء ولا تسر المحبين النجباء والوعي عندكم قد تبلبل وتشوه ، وافتقدتم ميزان الاشياء ، وأخذت تجركم الاهواء حتى تخبطتم تخبط عشواء بليل مدلهم السواد ، فأنما الشعوب بتاريخها ، وآثارها شواهد حية على سلبها وايجابها وهي شيء لايمكن تعويضه لذا فأن الامم الحية تحافظ على آثارها كما تحافظ على حدقات عيونها ، وبها تفتخر وتحافظ على حاضرها لبناء مستقبلها . فلم نر امة من الامم اختلفت على تاريخها والحفاظ على شواهده الا انتم . فقدتم كل شيء في حاضركم فأخذتم تستهزؤن بكل شيء بخفة وبلا مسؤلية حتى صرتم نهبا مشاعا لكل من هب ودب يساندهم منكم من اثرى على حساب مصائبكم من قومكم وارتضى ان يبيع نفسه ويبيعكم ارضاء للاسياد .
قلت يا عم ولكننا بذلنا الكثير من دماء الشهداء الحارة ، فما قيمة الحجارة البارده ؟
بان الحزن على وجهه والالم . ولف له سيكارة وولعها واخذ نفسا طويلا ملا الجو بدخان كثيف ، ثم اجاب :
اعلم يا ولدي ان قصتكم كقصة سعيد .. فيما مضى من الزمان كان الناس يشترون العبيد علنا وليس مثل الان حيث تستعبدون بطرق لعينة ومستترة وانتم تتصورون انفسكم احرارا وتفتخرون بعبوديتكم المستترة .كان احد التجار الموسرين قرر شراء عبدا يستعين به على اشغاله وأموره فذهب الى سوق العبيد ولفت نظره عبدا مفتول العضلات ، في كامل صحته ، اسمه سعيد ،ولكن لم يقف عليه احد فسأل مالكه فبين له ان فيه عيبا يمنع الناس من شراءه وهو انه يكذب في السنة مره ، فضحك التاجر حيث ان الناس يكذبون في اليوم الف مره فأشتراه ووقع على صك يتحمل فيه مسؤلية عيبه .. سر بيه التاجر فقد كان يعمل باخلاص وحماس . وفي يوم ذهب التاجر مع رفاقه التجار الى بستان له للنزهة وقد جهز سعيد كل المستلزمات وخدمهم في نزهتهم بافضل الخدمات . تذكر التاجر شيئا قد نساه فارسل سعيدا ليجلب له مبتغاه . وقبل ان يصل سعيد الى المدينه . شق ثوبه ومرغ بالتراب جسده ودخل المدينة وهو يلطم على رأسه وقال للناس ان التجار قد وقع عليهم الجدار ، ثم ذهب الى البيت واخبرهم المقال وان عمه قد مات فصرخت النساء ولكنه قال لا يلذ العيش بعد موته فاخذ يحطم كل ما في البيت وعائلة التاجر معه . ثم ذهب الى الى الزريبة فسمم الحيوانات ولم يبق اثرا لشيء . سألني ؟ ما علاقة موت التاجر بتدمير كل شيء ؟ قلت : لاتوجد علاقة ، بل هو عمل اخرق . قال اذن ما ذنب الآثار بدم الشهداء حتى تفرحون بتدميرها ؟ صمت لانني لم اجد علاقة معقولة وخرجت تاركا العم مع حزنه وسيكارته

الاعمى والصينيه

الله بالخير ..
يكولون اكو واحد عزموه على عزيمه دسمه كلش اخذ ابوه الاعمى وياه وكاله : بويه انت ما شوف من اندسك اكل لان بدت الوادم تاكل .. كاله خوش بويه .. صدفتن كعد واحد يم الاعمى يحوس وجان يطخ بالاعمى والاعمى مد ايده ياكل .. بسم الله قبل ما تاكل الوادم .. ابنه ندسه عود لا تاكل .. الاعمى انشحن وكام ياكل حيل .. ندسه ابنه حيل حتى يبطل وجان صدفه طخه حيل اليحوس وجان يشيل الصينيه ويصيح : عمي كولو صارت فرهود .. هسه ولا سالفة العراق التفرهد ؛ ماكو اولاد حلال يشيلونه كبل ما يظل بيه بس الكشر ؟
فيمالاه
#العم_هلكان

كله من الله

*
ايا كانت الرؤية لتحليل الوضع في الاتحاد السوفيتي فأن الناس كانت تدفعهم المثل العليا للاشتراكية وعلينا ان نفرق بين مصالح الدولة وحقيقة الرؤيا الشعبية او تبنياتها ..
*
 لقد قال ماركس ما معناه .. ان الصراع اذا لم يؤدي الى انتصار احدى الطبقتين المتصارعتين فقد يؤدي الى انهيارهما معا .. ما يجري في العراق والمنطقة هو الاحتمال الثاني .. انهاك كل اطراف الصراع ، وانهاك المجتمعات ببشرها وثرواتها الى حد الاعياء التام فيتم السيطرة على ثرواتها ومقدراتها لصالح قوى الهيمنة للمركز الرأسمالي .. في ظل العولمة ، تكون الغلبة لدور العامل الخارجي مع استغلال التناقضات الداخلية وتوظيفها ، بعد ان عجزت هذه المجتمعات المحلية عن حل ازمة التطور الاقتصادي والاجتماعي والسياسي .. ومن هنا نفهم اشتعال الصراعات الدينية والقومية العبثية وغير المنتجة كوسيلة لأنفاذ هذا المخطط
*
 اكثر كلمه ( هتيجبلي النئطه ) هي كلمة :
‫#‏مكونات‬
‫#‏العم_هلكان‬
*
كله من الله .. هذه المقولة الشائعه مثل السكين ذوحدين .. من نهبو ثروات البلد وصارو احوال ، و يتلاعبون بالاسعار ويستغلون الاوضاع للأثراء ، يكولون هذا من فضل ربي ، والله يرزق من يشاء بدون حساب ، والفقير المفقر المكتوي بنار سرقاتهم وتلاعبهم واستئثارهم واخذهم ثروات ودوائر البلد ، فلاحة ملاجه ، يكلوله اصبر ان الله مع الصابرين وامتحان ربك يريد ايشوفك تصبر يولا .. معقوله الله يفتكها عليكم ويضيكها علفقره ؟
‫#‏العم_هلكان‬

دولاريات

* البعض يعجب من التلاعب باسعار الدولار ويطلب من الحكومة معالجة الامر .. عمي هي هاي الحكومة منفذ لاقتصاد السوق الطفيلي وهو رب نعمتها .. اقتصاد السوق الطفيلي وممثليه من الطبقة السياسية السائدة واحد ولوما هوه من يعرف صخيمه ابسوك الغزل ؟ انسه
‫#‏العم_هلكان‬ 
*
لابو اقتصاد السوق .. لابو اللي جابه
مركصهم الدولار .. كلهم اذنابه
ويعبر على الطيب ونيني .. وعليهم
*
مابين داعش الافكار وداعش الدولار ، ضاع العراق والله الستار
داعش يذبح
الدولار يصلخ
العولمة دقت بابنا
" الزواج " تزرع
الكتل تشفط وتبلع
نزل سعر الدينار
ارتفع سعر الدولار
كش شعب
" القراءة الدولارية "
‫#‏العم_هلكان‬ 
* 

قرأت كتاب الله كثيرا فلم اجد فيه :
" ان الله مع السارقين "
‫#‏العم_هلكان
*
اغلب من يرفضون نظرية المؤامرة ، يرفضون وجود تدخل خارجي للدول المهيمنة ،ويعزون كل شيء الى التناقضات الداخلية ، وهنا الخطر ، حيث انهم يمنحون صك براءة للجرائم التي تقوم بها الدول المهيمنة .. هو كالخيط الرقيق بين الظلام والضوء عند الفجر ، وكالشعرة التي تفصل التجارة عن الربا .. هنا تمرر " المؤامرة "
‫#‏العم_هلكان‬
*
انوح وما بطل وني ولاهود
لعلتي ما نفع روبن ولا هود
تراها خربت من سابق زمن هود
وسفينة نوح ما حنت عليه
*
اختلاف اللصوص على المسروقات ، ليس معناه ان بعضهم على حق .
من كتاب ( البديهيات المنسية في زمن عولمة السيبنديه )
‫#‏العم_هلكان‬

لك الله يا عراق

* نكتة من الزمن السابق .. سأل احدهم صديقه الكردي :
* وين انت هلأيام كاكه ، منشوفك ؟
* والله كاكه ماكو وكت ، الصبح بالدوام والعصر جيش شعبي ، وبالليل بيشمركه
هسه يبعد عمك ، هسه اغلبنه صار مثل سالفة صاحبنه يبدل اوتماتيك ومثل ما يكول المثل الشعبي المصري ، الرزء يحب الخفية وتاهت الشغله ما تعرف رجلها من حمامهه .. الك الله يا ‫#‏عراق‬
* من اقوال ‫#‏العم_هلكان‬ :
وكيف تستأمن الذئاب على غنمك يا ولدي ؟! هل جننت ؟؟
* جنت اقره ان وسائل الانتاج وطبيعة النظام السياسي ـ الاقتصادي هي التي تحدد سلوك الناس .. نظريا مقتنع بيها ولو ان تشابك العوامل وتفاعلها يثير الدخان ويجعل الصورة اكثر غموضا بحيث تحتاج مجهر حتى تكشف سر العلاقة .. بس وره ما سادت العولمة العالم وظل الدار لمطيره وطارت بيه فرد طيره ، توضحت الصورة وصارت الامور مثل الصناعات الان .. كلها الها عمر وتنذب بالشارع وره فترة .. اشو هسه الانظمة كامت تبدلها امريكا مثل ما تبدل الحذاء العتيك ، وكذلك عملائها .. لا والكارثة الناس صارت تبدل مبادئها وقيمها وعقائدها مثل ما تبدل الموبايل كلما يجي موديل جديد .. ما تعرف اليميني من اليساري ولا الحداثوي من الاصولي ، وصايرين مثل الشواذي ( القرود ) اذبه على راسه ايطيح على رجليه .. والله عمي يبو لحية حجيتها منذ اكثر من قرن وريتك عدل حتى اشوف ان الاقنعة كلها انشالت وصار اللعب علمكشوف بدون ذرة مستحه والنقطه العلكصه انشالت .. عالم جليل الحيا ، وانه ابوك
‫#‏العم_هلكان‬
*بعد ان القى ‫#‏العم_هلكان‬ السلام وجلس .. ولع سيكارته واخذ نفسا منها . قال :
في قراءة قديمة ان فقيها اراد ان يستعرض علمه على رجل ، فقال : اترى هذه المجلدات ؟ انها تبحث في الطلاق . فرد عليه الرجل : لقد اغنانا الله عن كتبك هذه بآية ، ثم خرج .. عمي لتصعبوه علعالم .. الصح والخطأ ممكن تعرفه بقليل من الفطرة السليمة والعقل فأرجعوا الى فطرتكم وعقلكم لو عاجبكم تسوون الناس قطيع .. سحق سيكارته بحنق كأنه يسحق عدوا لدودا ، ثم خرج
* الفساد المالي والاداري والسياسي ، الوجه الآخر لداعش . دون هذه الرؤية يكون الكفاح ضد داعش كفاحا اعور .. ضحك على الذقون .. ( استزواج ) بالعامية العراقية ..
سيدحر داعش دم وشقاء وعرق الفقراء ليحصد النتائج السياسيون والمنتفعون والسفهاء ويكد ابو كلاش والياكل ابو جزمه .. وتيتي تيتي مثل ما رحتي اجيتي , وراح يلعب بيها نفس الخرب بيتي
‫#‏العم_هلكان‬
*هل ما يعانيه العراق نتيجة للمحاصصة ، ام ان المحاصصة واحدة من منتجات العملية السياسية ؟
* لو دققنا في التاريخ الاسلامي لوجدنا ان هناك فقهين ومشروعين ، فقه السلطة وفقه المعارضة ، وسبب الاختلاف ليس فقهيا ، بل بسبب الموقع السياسي لكلا الفريقين . حتى نحل الاشكاليات المستدامة بين الفريقين ، علينا تناولها من خلال منظور سياسي وليس فقهي .. المشكلة على الارض وليست في السماء .
‫#‏العم_هلكان‬

كعب اخيل

القراءة للشياب فقط
اكو وحده كان اخوانه زغار وابوها رجال جبير ، وجانت تطلع ابمكانه اداري الزرع .. تسكيه وتعتني بيه .. البنيه جانت حلوه كلش . واحد من الشلايتيه جان عنده نيه سوده وياهه فجان يراقبها باطراف الكاع مالتهه وكلما يريد يقترب حطت ايدهه على الخنجر وسحبته يلهث وحاد يكص عظم البعير .. يوم من الايام تجرأ وتقرب منها وجان تسحب الخنجر وكالت له : ولك منعول الوالدين اشعدك تحوم هنا جنك واوي ؟ تروح لو اطشر مصارينك كدامك .. كالها يبت الحلال هسه غير تعرفين السالفه .. كلما ارد اكلك جريتي الخنجر . كالتله احجي سالفتك من يمك وفضها . كالها عمي نذرت لله ما صار الاريده ، ما خليت نبي ولا امام ما نذرتله هم ماكو فايده ، نذرت الج صار الاريده وهسه جاي اوفي النذر .. طلع خمس دنانير بذاك الوكت جانت تحجي ، وكلها نذرت انطيج خمس دنانير بس اشوف جعب رجلك ، بين قوسين كعب القدم .. صفنت هاي وكام تبرر لروحه : شكو بيها واذا شاف جعب رجلي ؟ نزعت دستة الجواريب وراوته جعب رجلها والرجال خله ومشه . غط كم يوم وكام يراقبها بدون ما تشوفه والبت عينهه عالدرب .. هذا ما نذر بعد ؟ اخونه اجاهه وكاللها عمي انتي ( سرك باتع ) هم نفس القوانه ولمن نذرتلج يله تحقق الاريده وهاي عشر دنانير بس اشوف ساقج للركبه .. المهم ما اطول عليكم السالفه والنتيجه مبينه .. هسه ولا احنه دوم تبدي عدنه من جعب الرجل ونغلس منا لمن ... والعياذ بلله ..
لابو جعب الرجل .. ولكم هذا طلع ( كعب اخيل ) .. انه اخوك هذ اخيل من يا عمام ؟
ملحوظه
( قولو عني ما شئتم ، بذيء ، مبتذل
وهل هناك بذاءة اشد مما نحن فيه ؟ )
‫#‏العم_هلكان‬