لماذا الاضطرابات في دول شعوبها مقاومه؟

والثورة من اجل كرامتها وحقوقها الاجتماعية ، ونظام اكثر عدلا . وان موضوعنا هذا لا يتناول البحث في هذا الامر وانما في اشياء اخرى . ابتداءا علينا الاشاره الى اننا مع حق الشعوب في الاحتجاج

اشكاليات " الربيع العربي " .. الاحتجاج الجماهيري

عندما نزلت الجماهير بشكل واسع ، واحتلت الساحات ، مطالبة باسقاط الانظمة ؛ انتعشت قلوب اليساريين ، بالذكريات العظيمة للكفاح الثوري الذي تلاشى تقريبا بشكله الصدامي من اجل حقوق الشعوب والكادحين والكرامة الانسانية .. من كان يصدق ؟ لقد كان حجم التضحيات والقدرة على الصمود والتصدي المستميت للحملات القمعية باهرا يعطي الانطباع عن حجم ما وصلت اليه معاناة الجماهير ويأسها من استمرار الحياة في ظل الاوضاع التي تعيشها . من جانب اخر ، لنلقي نظرة على ما جرى وما نتج من هيمنة عناصر الردة الاكثر سوادا من الانظمة ، ومشاريعها المضللة ، المتخادمة في الجوهر مع المصالح الاستعمارية ، وكذلك طابعها التخريبي للنسيج الوطني ، ومجرد القاء نظرة فاحصة على ما حدث في هذه الحراكات ، حتى نرى مؤشرات خطيرة ، اخرها وليس نهايتها ما حدث في السودان ، وما انتجته من هيمنة الخط النيولبرالي ، المطبع ! كما نشاهد الطابع الانتقائي لهذه الاحتجاجات وخصوصا في دول محسوبة على حركات التحرر في العقود المنصرمه ، بينما بقيت الدول الاكثر رجعية وارتباطا بالغرب على حالها الا من بعض الضربات في الريش . وفي هكذا وضع مركب لا تجدي الرؤى السطحية في توضيح ما حدث ، كمثل اتهام الجماهير بالعمالة وانها مدفوعة الثمن ، فحجم التضحيات لا يقر هذه الفرضية ، وكذلك النظره الطهرانية على هذه الاحتجاجات وتمجيدها بدون النظر الى ما انتجته من نتائج ضاره ، على الضد من ادعاءاتها بالثورية ومصالح الشعب فقد اثبتت الاحداث ان كثافة التواجد في الشوارع تحت شعارات ضبابية لاتمس جوهر انظمة الاستغلال اخطر من السكوت عن هذه الاوضاع .. انها حالة مركبة ومعقدة تحتاج الى اشتغال الفكر بكثافة لمعرفة لماذا يحدث هذا ؟

خرطوطه

الله بالخير
فد خرطوطه _ مصطلح تم نحته من المصدر خريطي _ نيو لبراليه شائعة ، احنه اشحصلنه من الثورات ددددد .. الخ خل نرتاح مثل العالم ! نسو ان تطور اوربا نشأ بعد الثورة الفرنسية التي تسببت بالاطاحة بكل الحكومات الاقطاعية ، وان الثورة الامريكية على الاستعمار البريطاني قد انتجت الولايات المتحده الامريكية بزرها ، وكذلك ثورة اكتوبر العظمى التي جعلت مطلب العدالة الاجتماعية يجول العالم شبحا يرعب المستغلين .. جبناها على الثورات العالميه بس ، وانتم بكيفكم
ثيمالله
#خرطوطه
#نيولبراليه
مع تحيات عمكم
#العم_هلكان

الوعي راكد

الله بالخير ..
يكلك وينها كرونا فلم سوته الحكومه حتى تقضي علمظاهرات ، مو هاي امريكا جاي يطلعون مظاهرات ..
* ينشر الكثير من المواطنين نعيهم لمن رحل بالكرونا وتعرف انت ناس من وادمك ديموتون او ينصابون ، والاخ يريدك اصدك تنظيره ماكو كرونا
* امريكا ماتو بالكرونه 110000 والحبل علجرار يمكن انتلو بالكهرباء وماتو
* المظاهرات الطلعت بهل الاتساع من اسبابها الرئيسية كورونا واستهتار ترامب بمعالجتها حيث
- اكثر المصابين من السود اللي نسبتهم 12% من السكان
- اكثر من 40 مليون عاطل بسببها
- ناس كثيره ليس لديها اموال لمواجهة الحياة الصعبة والعلاج
كل هاي انماط التفكير عدنه وتتعجب شلون انخطفت الانتفاضه ؟! عمي الوعي_راكد الله وكيلك
ثيمالله
#العم_هلكان

عصر التفاهه

الله بالخير
قامت امريكا ، وبأمر من ترامب ، بحرق مزارع الحنطة في سوريا .. الشعوب الفيسبوكيه سكته يم حسن سكته ، والدنيا فاكه اربع ويلات ومتربعه ، وحته اذا واحد نشر الخبر محد ايكله السلام عليكم !
- تحترق حقول الحنطه في العراق وهي هاضت المنشورات ! ايران حركت الحنطه ، ماتريد العراق يتطور ودددد مثل العجوز الماكلين عشاها وظل ادردم ، يابه تره احنه نستورد الحنطه من استراليا وامريكا وروسيا خل اندور الفاعل الحقيقي ؟
- راسا وتكب عليك العيطه ، انت ادافع عن ايران الاحتلت ارضنه ، ووو وما تخلص بريشاتك
- يابه انعل ابو كلمن احتل ارضنه ، لابو عشيرته اي كان ، جا امريكا أسوت بردت ، قصدي حررت ، ارضنه اشو مغلس عنها ؟ كلعاده سكته يم حسن سكته
الشيء بالشيء يذكر .. الكهرباء جاي تنكطع وابو المولده مغلس ، عمي جانتم حولان ؟ متكولون ايران السبب وسوو ثوره ، انتفاضه ، عصيان مدني مو كتلنه الحر
المهوم ، امانه بركبة كلمن يعرف هذا الفيلسوف الالف كتاب عصر التفاهة يبوسلياه من راسه ويكله هاي البوسه من عمك هلكان لان بس انت عرفت السبب .. ثيماالله
#العم_هلكان

الطريقة الابو طبرية في ترويض البريه

الله بالخير ..
منو من الشياب ربعي يذكر اول ما اجو البعثيه للحكم ، بثمانيه وستين من القرن المرحوم ومن عدها اشتغلت رحمة الله ، وليومك ، لنجاعتها في " تحويل النمور الى خرفان والقفص الى مدينه " حسب رواية زكريا تامر ، رضي الله عنه ،.. يوم ماكو معجون وكبت العيطه ، وادى ذلك الى احتفال السمج بعد ما ملت الوادم ، لا معجون لا نفط لا غاز فاضطرت الوادم اذب السمج بالشط وكام يهوس ، هلهوله للبعث القائد . نوبه الحنطه المسمومه ، نوبه عدنان القيسي والعكسيه والزعاطيط مطافر وكلساع واحد طايح ومكسوره ايده . انوب ابو طبر والعراق يرجف من زاخو الى الفاو وتالي طلع ابو طبر وي اخوه واخته يمكن ، ماينطلع بيهم للسوك . انوب اجه الاحتلال وياطلابة البعثية الماتخلص ويومية مطلعيلك سالفه واجاك الذيب واجاك الواي ، نوبه القاعده ، تالي كلبوها علبطانه وصارت داعش ، من غير طنطل الفساد العيونه بالطول .. تعلمنه وكمنه نحس بالفراغ اذا ماكو سالفه غبره نسولف بيها .. هسه بعد ما طلعت ارواحنه من سالفة النبك طلعتنه سالفة العلم وعلى هالرنه طحينج ناعم !
شوف عمي انت ما سامع بالحكمه ، لاتكن قشمرا فتركب ! ثيمالله
#العم_هلكان

رجع ابو المقاوله

الله بالخير ..
على كولة القس توتو كالونه الغزاة غمضو عيونكم وادعو لله ، فكينه عيونه لكيناهم ماخذين الارض وتاركينه الانجيل ! اروع تعبير عن طبيعة الاستعمار وغاياته .. المهم احنه جان عدنه طاغية درجه اولى جزع الوادم ابطلايبه وقمعه لحد ما كرهت الوادم حتى نفسها ولهنا صرخت امريكا وكالت عده سلاح شامل وراح يدمر الوادم ، هههه امريكا العفيفه اللي هي الوحيده الاستخدمت القنبله الذريه ومسحت مدينتين باليابان كاتله الناس وخايفه عليهم من السلاح النووي ! ههههههه واحنه صدكنه وناشدنه الموشتمع الدولي يخلصونه .. امريكا كالت خوش وراحت للدول الحكو عده اسلحه " ممنوعه دوليا " هههه وهاي اسرائيل ابصفنه عدها فوك الميتين راس نووي فنه اليجيب طاريها ! الدول كالت الهم يمعودين مو نبشنا البلد نبش كلشي مالكينه اكعد راحه ابو درب .. شسوه ؟ كام يصرخ الحريه للشعب العراكي وياها دسته من حقوق الانسان والديمقراطيه ووو .. فد تشكيله اللي تعجبك ، وهم هوست الوادم وكام تعوج حلكها ونست تشرين ونست اتنيسن وياج اخذيني وكام اصيح ثوار اكتوبر ، المهم طبو على جماجم الشعب العراقي وملايين القتلى والجرحى والمقودين والمهجرين والمهاجرين ، ومليارات الدولارات التبخرت وما نعرف شظل من كاعنه ونفطاتنه ومياهنا المهم عدنه انتخابات مال سوك مريدي !
السالفه وما بيها يبعد عمكم ابو المقاوله الاصلي ابو الحريه للشعب العراكي رجع يشتغل الشغل بيده ويوخر قسم من المقاولين الثانويين ويحط مقاولين جدد لما يكملون نهيبتكم وانتو ظلو مجلبين بقشمرية الانتخابات .
ثيمالله
#العم_هلكان

كتله احبك

( ﮔتلة أحبك ﮔالي شنهو الدليل )
ﮔتلة حبي للعراق وناسه
ﮔالي برة الهوه والله عليل
ﮔتله ما تحلالي غير أنفاسه
ﮔالي عدكم خلاف وأختلاف
الوان شته وذبحته حراسة
ﮔتلة شدات الورد شتى الانواع
واختلاف العطر من لذاته
مو عراقي ولا شرب ماي الفرات
الفرق الواحد وﮔال اجناسه
شعب واحد من زمن سومر وجاي
آفة تبلع من أجه بآفاته
عصى موسى الهزت عروش الطغاة
اوثورة العشرين اوكل ثوراته
لو رجعنه بعد للماضي البعيد
اقره هلتاريخ تعرف ذاته
ما سكت يوم العراقي على الضيم
ثائر ابطبعه على علاته
شفت يوم الذهب زنجر يافهيم
طبع شعبك ترة من ذراته
طبع شعبك ترة من ذراته

الفزعه ظاهرة عراقية متأصلة

الله بالخير
في اواخر ستينيات القرن المرحوم السابق ، حدث في مدينتي ، حريق سوق النجاجير ، وهو في السوق الرئيسي للمدينه ، يعني اصور سوق كله خشب يحترق ممكن يحرق السوق كله ..كنت متمدد على فراشي واريد انام ، فوك السطح ، واذا باصوات صارخة تولل وهلاهل عالية ، وهي علامة الانذار بوجود حريق ابتكرتها العقلية الشعبية الرائعه ، وهي علامة التمييز بين علامة الوفاة وعلامة العرس ،
فتحت عيوني لارى السماء كتلة من لهب فخرجت حافيا وبنص هدوم ، راكضا باتجاه الحريق فدهشت لحجم الحضور : هاي شوكت اجو لان ييتي الاقرب الى السوق ؟ ! كانت ملحمة بحق ؛ سروات من البشر يحملون سطوله من الشط الى السوق ، حيث كان السوق مطلا على النهر ، وهم يرشونهه ليعودوا الى ملئه من جديد ومظاهر بطوليه لا حصر لها واستبسالا في الوصول الى المناطق التي يصعب الوصول اليها . ما اطول عليكم بذاك الوكت الدوله ما عدها امكانات فاستدعت سيارات الاطفاء من المدن القريبة وكم كانت دهشتهم عندمت وجدوا الناس قد اطفأت هذا الحرق الضخم بادواتها البسيطه .
رباط السالفه عمي اللي طلعو بيهم الشريف وبيهم المكسر ، بيهم البعثي وبيهم الشيوعي وبيهم الاسلامي وبيهم جماعة البار وبيهم جماعة الجامع ، بيهم اليدور بنات وبيهم من يشوف المره عينه ادك بالكاع . يعني الفزعه بدم العراقي من ايام السومريين ، فعاد خل نخجل شويه من المهاترات والمعايير ، بينات اليوزعون معونة الكورونه ، هم هاي سويتوهه محاصصه ؟ خصم الحجي عمي هاي ظاهره عراقيه اصيله واللي يسويها لمنافع خاصه هذا لو مو عراقي ، لو فاصخ عراقيته ونبقه نكول : الله يطيح حضج امريكا .
ثيمالله
#العم_هلكان

بتاع كلو

الله بالخير ..
ذكرتني ، الاحداث ، بنكته من ايام ذاك الزمان ، يكلك فد واحد سأل صديقه الكردي : ها وين كاكا متنشاف هلايام ؟ فجاوبه : والله مشغول كاكا الصبح دوام ، والعصر جيش شعبي ، وبالليل بيشمركة .. مشكلة العراق السياسيين يمثلون كل الادوار وبمهاره .. همه حكومه وهمه معارضه ، همه ضد الاحتلال وهمه وياه ، همة مع المطالب الشعبيه وهمه ضدها ، همه وي المحاصصه وهمه وي الاصلاح ، همه ضد اسرائيل وهمه وياها ، تجي للانتفاضه همه نصهم بالساحه وهمه نصهم يكتلون بالمنتفضين ، همه يطالبون بحصر السلاح بيد الدوله وهمه يطالبون بحصر الدوله بيد السلاح ، ذوله سياسيين لو شنو ؟
اخلي الجواب يمكم انتو اجاوبوه وآنه اروح .. اودعناكم ،
ثيمالله
#العم_هلكان

بين الكورونا وابو علي الشيباني

الله بالخير
الكورونا ابجفه وابو علي الشيباني بجفه هههههه شفتله فديو وحده كالتله واحد من عائلتها طلع بالثمانين ومار جع كالها بعد ما اخذ خيره ومنو كالج طلع موجود بالعراق كالتله ما هو بايران واختفه كالها ها مو محيط البصره بعربستان تابع للعراق بالنسبه الي ههه ذكرني بهذا الكال ها الفيل يطير بس مو كلش عالي ..
يكلك والعهده على الراوي ، فد مره اجتماع حزبي بالجيش ، وتدري بالجيش المو حزبي يبتلي على روحه بزمن صدام ، المسعول سعل الرفاق الفيل يطير لو لا ؟ واحد عود على اساس نبه ، خبص الدنيا .. استاذ استاذ ، كاله الرفيق : احجي رفيق . كاله وين اكو فيل يطير رفيق ؟ الرفيق كاله انجب ولك ، القائد الضروره يقول يطير . النبه اذا ذبحه ما تلكه بي قطرة دم من الخوف .. كله رفيق هو يطير بس مو عالي ..
هسه الله يكون بعون العراقي النبيه لان يعيش بين منطق جماعة ابو علي الشيباني ، وبين منطق جماعة الفيل يطير
حماكم الله من الكورونات ، ثيمالا
#العم_هلكان

حول ظاهرة داعش

من المعلوم ان الحروب هي حالة استثنائية ، في تاريخ الانسانية ، وليست القاعدة . ان وراء دخان المدافع اسباب ومسببات ، فليست هناك حرب لأجل الحرب . من خلال هذا المدخل نناقش مسألة داعش .. تحاول داعش ان تظهر نفسها بأنها ممثلة للنقاء الايديولوجي " الديني " وبأساليب بلغت ما بلغت من التوحش " كللت " جبين البشر بالعار، وهنا الخدعة .. ينساق الكثير من النقد الى الحوار هل هي تمثل الاسلام ام لآ ؟ ويركز على وحشيتها وكأن الوحشية ملازمة فقط لداعش ، رغم ان التاريخ مليْ بالصراعات الوحشية ، اليست الحروب شكلا من اشكال " الوحشية " ؟ ! وهل المسألة تكمن في ان حقيقة الخلافات بين الجماعات اسبابها فكرية ام ان لها جذور اخرى يحاول الفكر ان يجد لها تبريراتها؟ من نافل القول ان هناك تلابسا يحصل واختلاطا بين الاسباب السياسية والاقتصادية وبين الايديولوجيا الى درجة يصعب الفصل بينهما وقد يقفز هذا العامل للتصدر على حساب العوامل الاخرى ، كون الانسان كائن مفكر ، وهو اختلافه الاساسي عن الحيوان فلم نسمع ان الكائنات المفترسة قد قدمت مبررا عقائديا لافتراسها للحيوانات الاخرى ، لكن نقد داعش من منظار عقائدي او سلوكي يجعلنا مبتعدين بأتجاه معاكس عن فهم الظاهرة وكيفية علاجها ، وسنظل نحارب طواحين الهواء.
ان ادانة داعش بأعتبارها طاعون بشري حتما هو جزء من الموقف الاخلاقي المطلوب ، ولكنه لا يتنافى مع الفهم التحليلي وهي ان داعش هي نتيجة تأزم وضع محدد وانسداد افقه ، اضافة الى استغلالها من القوى المهيمنة في المركز الرأسمالي والاقليم .
ان ما وراء دحر داحش عسكريا يتطلب مشروعا سياسيا يأخذ بالاعتبار نقض البنية التحتية لداعش وأمثالها والمتمثلة في تقسيم الشعب العراقي الى جماعات صهرية طائفية وقومية .. فليس من المعقول ان تقيم بنية سياسية تعمد الى تقسيم الشعب الى مكونات وتريد منها الا تتصارع وهي اساسا نتجت عن خلفيات الصراع التاريخي الطويل وشجونه
2017

نفطنا ودمائنا

الله بالخير ..
لقد شقت احشاء الارض برعونه وبدون رحمة ، وانتزع حليبها الاسود بجنون ، فيما تراجع كل شيء في العراق يمت للحياة بصلة ، رغم الكم الهائل من الثروة التي لم يعرف صرفها بوضوح ، واين تذهب ! هاي القصة والباقي هرمله على ضفاف الرافدين وضحك على الذقون وقشمرلوغيه لم نمر بها حتى في الفترة المظلمة من التاريخ . شيئان يسيلان ويهدران :
#نفطناودمائنا
ثيمالله
#العم_هلكان

كعب اخيل

الله بالخير
كعب اخيل
القراءة للشياب فقط
اكو وحده كان اخوانه زغار وابوها رجال جبير ، وجانت تطلع ابمكانه اداري الزرع .. تسكيه وتعتني بيه .. البنيه جانت حلوه كلش . واحد من الشلايتيه جان عنده نيه سوده وياهه فجان يراقبها باطراف الكاع مالتهه وكلما يريد يقترب حطت ايدهه على الخنجر وسحبته يلهث وحاد يكص عظم البعير .. يوم من الايام تجرأ وتقرب منها وجان تسحب الخنجر وكالت له : ولك منعول الوالدين اشعدك تحوم هنا جنك واوي ؟ تروح لو اطشر مصارينك كدامك .. كالها يبت الحلال هسه غير تعرفين السالفه .. كلما ارد اكلك جريتي الخنجر . كالتله احجي سالفتك من يمك وفضها . كالها عمي نذرت لله ما صار الاريده ، ما خليت نبي ولا امام ما نذرتله هم ماكو فايده ، نذرت الج صار الاريده وهسه جاي اوفي النذر .. طلع خمس دنانير بذاك الوكت جانت تحجي ، وكلها نذرت انطيج خمس دنانير بس اشوف جعب رجلك ، بين قوسين كعب القدم .. صفنت هاي وكام تبرر لروحه : شكو بيها واذا شاف جعب رجلي ؟ نزعت دستة الجواريب وراوته جعب رجلها والرجال خله ومشه . غط كم يوم وكام يراقبها بدون ما تشوفه والبت عينهه عالدرب .. هذا ما نذر بعد ؟ اخونه اجاهه وكاللها عمي انتي ( سرك باتع ) هم نفس القوانه ولمن نذرتلج يله تحقق الاريده وهاي عشر دنانير بس اشوف ساقج للركبه .. المهم ما اطول عليكم السالفه والنتيجه مبينه .. هسه ولا احنه دوم تبدي عدنه من جعب الرجل ونغلس منا لمن ... والعياذ بلله ..
لابو جعب الرجل .. ولكم هذا طلع ( كعب اخيل ) .. انه اخوك هذ اخيل من يا عمام ؟.. هسه مو تنسون تره تبدي من جعب الرجل! مو تغلسون ؛ ثيمالله
#العم_هلكان

الفراغ الدستوري

الله بالخير ..
الله يرحم الزاير رجال فقير بس لوكي مال حزب البعث .. صارت الانتفاضة مال ال91 ، وهو معلك علمنظمة وره احادية واجت الجماهير تحاصر المنظمة فشافته .. كلوله زاير انت فقير وما عدنه شي وياك ، انزل وروح لاهلك جان يكلهم ما اجاني امر ورمه علناس فانكتل .. الجماعه يبين بعدهم ما جايهم امرولمن طحنه بالفراغ الدستوري .. يلله احسن الكم الفراغ وصرتو تعيشون مرحلة انعدام الجاذبيه ؟ عساكم بالفراغ ، ثيمالله
#العم_هلكان

القمع يعرقل التقدم ولكن لن يمنعه

الله بالخير ..
( جن لا لوليتي وربيتي ) هذه الاهزوجة من ايام ثورة العشرين التي اراد الثوار ابلاغ ام باستشهاد ابنها فكان جوابها الرائع : ( لوليت وربيت لهذا ) ..يعني ربيت ابني ليدافع عن الوطن ويستشهد في سبيله اذا اقتضى الامر .
قضية انتفاضة تشرين هليام مشابهة لهاتين الاهزوجتين ..فبعد كفاح مغرق بالدم طيلة شهرين تقريبا ، واوضاع خطيرة ظم عبد المهدي استقالته الى ان صار الد م للرجاب كما يقولون ليعلن استقالته " المشبوهة " وتعود الطبقة السياسية الى موالها القديم بمشاورات " الكتل " والكتلة الاكبر ونعيين رئيس الوزراء ولا كأن الشعب قد قال كلمته برفض هذه العملية " السياسية " واسسها والعودة كما كنا على مبدء ( جن لا لوليتي وربيتي )
لاعمي فقد سال بحر من الدم لن ينفع معه ذلك بل ينفع معه ( ربيت ولوليت لهذا ) اي الانصياع الى رغبة الشعب بالتغيير . كفى دما لايفعل شيئا سوى عرقلة حركة التاريخ ولكنه لن يمنعها .
ثيمالله
#العم_هلكان

العقال والكذله

اليوم الكذلة تسولف خلي عكالك للكلفات .. شعار من شعارات التظاهرات الشعبية العراقية ذكرني بازمنة سلفت .. ازمنة كان مصدر الاحتجاجات وامثولتها " العقال " حيث كانت كلمة واحدة تكفي للمرء ان ينكس رأسه بمجرد ان تقول له " عكالك بيه لطخه " حتى يفهمها بان شرفه ملطخ بالعار .. في ذلك الزمن كان العقال جزء من منظومة الرفض والاحتجاج والنوماس والدفاع عن الكرامة وارتبط بلفظ الزلم ، يعني الرجال ، حيث كانت ثورة الفلاحين التي عرفت بانها ثورة العشرين وغيرها من انتفاضات الفلاحين الطبقية والوطنية المستمرة والتي اذاقت الطبقة الاقطا _ برجوازية الكومبرادورية الويل ،هي ومشاريعها المرتبطة بالتبعية حتى تم اسقاطها في ثورة 14تموز الوطنية .
بعد ثورة تموز حدثت متغيرات عديدة حيث تراجعت تدريجيا امثولة الكرامة هذه عندما ساهمت بقايا الطبقة شبه الاقطاعية بالارتداد على ثورة تموز والقمع الرهيب الذي قادته فكان الرد : لا تفرح ابدمنه لا يلقطاعي / صويحب لو يموت المنجل يداعي .. وعاد المنجل كرمز للاحتجاجات جرى قتله واقصائه لصالح افكار الفاشستية القومية، وما سببته من دمار في المنظومة القيمية الثورية لتنحدر بعد سقوطها على ايدي الاحتلال الاجرامي الامريكي المتعدد الجنسيات للعراق .
نشأ ، جيل جديد تربى على المفاهيم الكاذبة والفردية لقيم " الديمقراطية " التي تستر بها الاحتلال فخلق جيلا اتسعت طموحاته بالحقوق الشخصية والعامة ،، والحرية ، لتصطدم بسلطة كومبرادورية نهمة ، اتاحت لها سلطة الاحتلال الاستغلالية الناهبة الكومشناتية الكهنوتية تدمير الاقتصاد والبلد لصالح المستغل الداخلي ، مع مواجهة كل آماله وتطلعاته بالدم والنار فكان " ابو كذله " الاسطورة التي رأيناها ببسالته وعزمه وتصديه للموت بشجاعه في الساحات .. لقد انطلق المارد من القمم ولن يتمكن احد من ارجاعه !

اقالة الساعدي

الله بالخير ..
اليوم نسولف على قضية عزل الفريق الساعدي دون ان يكون الموضوع حول حيثياتها حتى نوفر الجهد ، وما ندخل بمتاهة عراقية في الحوار ، لا اول لها ولا اخر ، وبالتالي نضيع راس الوشيعه بعدما نلعب بطروكها لعب !
لايختلف اثنان عن قيادته لدحر داعش في الموصل ، وعسكريا يتحمل القائد الفشل والنجاح ، ولو بالعراق ما عدنه هيج قاعده حيث يكرم الخاسر باعتباره بطل ، وينزوي الناحج لاسباب لا يعلمها الا المسيرون للاحداث في العراق !
المهم هناك ظواهر تلفت الانتباه فقد ظهر امتنان اهل الموصل واضحا وصل الى اقامتهم تمثالا له ، انزلته الحكومة ! ودعم واضح في اجهزة التواصل الاجتماعي من كل فئات الشعب بعيدا عن الطائفية والمناطقية ! ماالذي يعني ذلك ؟ انه يعني شوق الناس الى رمز يريدونه وطنيا عراقيا أ وفشل واضح لصيغة المكونات التي زرعها الاحتلال ، وهذا هو سبب هذه الهوسه المثاره حول القضيه . يابه العراقيون يحاولون استعادة عراقيتهم التي قتلتها صيغة حكم المكونات . ثيمالله
#العم_هلكان

شوية كرامه

الله بالخير ..
عندما اذل فلاحو فيتنام امريكا عند احتلالها لبلدهم فيتنام ، لم يقل احد اكو ان بالموضوع ولم يشرقو او يغربو بل قالوا ، ببساطه ،ان احساس الشعب الفيتنامي بالكرامه ، وتصميمه ، وارادته هو الذي هزم امريكا .. اليمنيون الحفاة عندما يصعد احدهم علدبابة االامريكية او الانكليزية او الالمانية تبع ال سعود المتطوره وهو لابس نعال ابو اصبع ، ويفجر داخلها قنبلة يدوية ، تشتغل الجنجلوتيات وخفة دم الربع ، ومحاولة اثبات ما لا يمكن اثباته ، ويكتبون كل ما يمكنه التشكيك بالموضوع . ببساطة لن يفهم البطولة من لا تعني له الكرامة والاراده شيئا ..

ونختم بقول غوار الطوشي ، في احدى مسرحياته ،عندما خابره ابوه من الاخره ، يتفقد احواله : شو ناقصكم يابي ؟ فرد عليه : ما ناقصنه شي غير شوية كرامه ، يابي ..
ثيمالله
#العم_هلكان

سوالف علسياسه

الله بالخير ..
سوالف على " السياسه "
اول شي لازم نقول ان استعمال مصطلح السياسه بالعراق بين قوسين ضروري لان هذا تجني فالسياسة " ان وجدت في العراق ، فانها تتلاشى يوما بعد يوم لتصبح اسطوره ومفقوده .. الله يرحم الموتى !
من وعيت علدنيه وآنه اسمع منطق السياسة عدنا يخبل ! ذاك الرجال جان يكلنه كنتو حفاي مو زين لبستكم قنادر ؟ هسه افتهمنه علم النفس يكول الانسان احيانا من يستعار من نفسه واصير عنده عقدة النقص يعير غيره بالنقص ماله ، هسه علمستوى الشخصي ميخالف ، بس مال اصير سياسه وتعير الناس بحلالها الما جايبه من جيب ابوك ، ومسوي منه علوادم فلا والف لا . ومن سن سنة سيئه يدفع ثمنها ما دامت تمارس .. يجيك ثاني ويكول لوما احنه جان اكلك الذيب ، فخل انهب واسلب وانعل ابو الخلفوك وانت اس .. ساموط لاموط ، وتالي تكوم بالخونه وتطفر بالدخل فهم يكولولك لا يبعد عمك .. عمي خل ياكلنه الذيب ونخلص ولا هلمنيه الذالنه بيها ..
خلاصة القول : هيجي سياسه ما اريدها مو البلد كاعد ينتهي من وره " سياستكم " الغبره .
ثيمالله
#العم_هلكان