من اول ما اجو البعثيين للسلطة في العراق ، واشتغلت المشاكل واللغاوي ويوميه مطلعين سالفه ادوخ بيها الوادم .. تخلص وحده تجي الثانيه ، والعراقيين علشحن دوم الى ان خربت الباتريات مالتهم ، الشياب مثلي يذكرون هاي الطلايب .. وحده منهن كامت السلطة الانقلابية " التقدمية " تركض وره البنات ، اللابسات تنوره قصيرة يملطخون رجليهن بالبويه .. اللابس قميص الوانه زاهيه يشككون قميصه ، المطول شعره يسون راسه خرايط وكل هذا امام الناس ولكم ان تتصوروا حجم الاذلال الذي يصيب المعتدى عل...يه .. كعدت شويه امخمخه براسي وجان اتخذ قرار بان هاي الشغله محوريه ويجب مقاومتها.. ابوكتها جانت الناس كلها تسولف بالجبهة الوطنيه .. افتريت علوادم وكلت لازم تكون مهمتنا الأولى مقاومة هذا التوجه الخطر للسلطه وجان تطفر عليه تنظيرات الرفيق البلغاري ما اذكر اسمه بس بي اوف حول أهمية الجبهات الوطنية واشتغلت الجواكيج والمناجل : عمي شنو هاي شغله بسيطة .. يعني نعوف الجبهة علمود شوية شعر باجر يطلع وابوك الله يرحمه .. خو اخوانه المتدينين كالو عمي عيب شنو انت تشجع التوفسخ والانحلال ويحك يا هذا ؟ انه هم كلت حقهم لان الجماعه متأثرين بحجي خير الله طلفاح الله يغفر ذنبه.. الشيء بالشيء يذكر ، صارت طرايف هواي بهاي الشغله ، مره حصرونه بمكان ما بيه مهرب منا ومنا وعريف " هتلر " فرحان وكامش المكص مالته من بعيد يطكطك بيه وماكو شرده اله انذب رواحنه بالشط وجان نجفت عله حلاق وهو فرح من شافنه ادسته .. جفتو علينه الجماعه .. ليش مطولين شعركم وتخالفون الحزب والثوره .. كلناله عمي ما تشوفنه يم الحلاق ؟ همه طلعو شويه وجان نفلت .المهم .. عمي أي تدخل في الحياة الشخصية للإنسان هو بداية الفاشية والاستبداد وخلق القطيع المطيع وهاي النتيجة .. الفاشستية القطيعية مستلمتنه ذمه من ذاك اليوم الى هليوم وهي " تتعمق " وتتجذر ... ومثل #الطنطل كلساع تطلعنه بشكل .. لابو كل الطناطل
#العم_هلكان الطنطل ليوجي
ليست هناك تعليقات:
إرسال تعليق