عبد الباري أبو التاريخ معلّم قديم طاحنته الدنيا طحن وما يملك منها غير بايسكل هندي ومكتبة. بالخمسة وستين تخرّج من دار المعلمين وتعيّن بالقرى والأرياف. چان يستلم الراتب منا، يخلصه على الكتب والمجلات العلمية منا. بالتسعة وستين انسجن بتهمة إزدراء الأديان، لأن گال للتلاميذ: سيّد سلمان ما يشوّر والدليل انا أحچي عليه وما يصير بيَّ شي. وكان للسيد سلمان ضريح مشيّد يقدّسه أهل القرية. بلّغ المدير على استاد عبد الباري وسجنوه سنتين عدل، أكل بيهن هوا. وره السنتين طلع إفراج. من طلّعوه گالوا له: تنچب وما تفكّ حلگك بعد.. إفتهمت وِلك؟.. إي افتهمت. خطيّة ظلّ منچب وما يتحرّش بـ “المقدّسات”. بالتسعة وسبعين انسجن أيضاً بتهمة إزدراء الأديان لأن گال للتلاميذ: الله ماله علاقة بهذا العَبَث، هاي الحروب يشعلها الساسة ويدفع ثمنها الأبرياء. المسكين بقى معفّن بالسجن ٣ سنوات ونص، وطلع بالعفو العام. من طلّعوه گالوا له: تنچب وما تفكّ حلگك بعد.. إفتهمت حيوان؟.. إي افتهمت. بقى منچب لحد الستة وثمانين. بالستة وثمانين اخذوه قاطع جيش شعبي وأثناء الهجوم على الشلامچة وگع أسير بيد الإيرانيين. بقى بأقفاص الأسر أربع سنوات شاف بيهن نجوم الظهر لأن ما يصلّي. بالتسعين طلقوا سراحه بصفقات تبادل الأسرى. من طلّعوه گالوا له: أغا انت تنچـــــب ڤتاكل خرا بعد زالك.. إفتهمت أغا؟.. افتهمت. خطية عبّود رجع من ايران شبه لاگف وماكل طن خرا. بالواحد وتسعين صار الحصار واسودّت الدنيا بعينه. حط له بسطية بالسوگ وگعد يبيع تتن ودفاتر لف وشخّاط. بالستة وتسعين اخذوه الأمن بتهمة إزدراء الأديان لأن گال: هاي الحملة الإيمانيّة مالة الجماعة تشبه الغطا مالة السبتتنگ. وره سنتين طلع امكسّر من السجن. من طلّعوه گالوا له: تنچب وما تفك حلگك بعد.. إفتهمت كلب؟.. إي فتهمت. ظلّ استاد عبد الباري منچب وماكل تبن الى أن صار التغيير وصاح أفّيـــــــــش، بعد ماكو ابن كلب يگول لي انچب عبّود. بالألفين وستة انسجن عبّود بتهمة ازدراء الأديان، لأن گال: الموامنة ما وراهم خبزة. وره سنة طلع من السجن بكفالة. من طلّعوه گالوا له: مولانا تنچب وما تفك حلگك بعد.. إفتهمت مولانا؟.. إفتهمت.
هي هاي حياة استاد عبد الباري أبو التاريخ، المگرود خلّصها منچبّ وماكل تبن رغم إختلاف الزمان وتبدّل السلطان.. هسه غير يموت ويخلص ...
منقوله
ليست هناك تعليقات:
إرسال تعليق