جواد ابو البدل والسميجيه

كان جواد ابو البدل الله يرحمه من مجانين الشطرة بس ماله اذيه على احد .. بس كلمة بدل تثير اعصابه وليش ما ادري .. انتو تعرفون احنه شعوب تخبل الصاحي فكان المسكين وين ما يروح ايصيحون وراه : بدل .. بدل . عندما يسمع هذه الكلمة يسرع في مشيه الى ان يركض بعدين .. يوم من الايام تحاشمت عليه الناس كلما يطلع من شارع يصيحون بدل الى ان تعب من الركض وتناوشله طابوكه سميجية معدله وتناوش بيها واحد وخله دمه يسيل .. كول ما علينه اشتكو عيه وجابوه للحاكم ، سأله .. شسمك فقال جواد صلي على نبيك .. كول صله الحاكم .. شسمك كاله صلي على نبيك .. بالثالثه انزعج الحاكم وصرخ بيه .. هاي شنو انته مخبل ؟ كاله نعم اني مخبل .. انته حاكم وعاقل وما تحملت ثلاث مرات الصلاه علنبي وانه مخبل وكلها اتصيح وراي بدل .. جزعت تناوشتلي طابوكه وصكيته بيها .. عاد يعمي انتو السياسيين راح تخبلون الشعب العراقي تره هي بس شعره وراح تنكطع وتشتغل السميجيات .. عمي نصيحه لوجه الله اعدلو ارواحكم قبل ما تنقطع هاي الشعره وما تدرون السميجيات امنين تجي احلفلكم بسنون النايبه العلواني وانه ما احلف بسنونه جذب .. اودعناكم

هلوسة

ياريل صيح ابقهر
صيحة قهر ياليل
ولك ياريل ..
حيل اصرخ
اريد تفزز السمره
حمد قد غادر المضائف
وابليس قد ترك الوسوسة وغادر
الوطن كالمسلخ
والقصابون كثيرون
الموت هو القاعدة
الحياة هي الاستثناء
ابليس ايها الجميل الموسوس
مثل ما بافلام الكارتون ،
عد فقد اشتقنا لوسوستك
وازح عنا الموسوسين الدمويين ، من جميع الماركات ،
ايه .. كم هي جميلة ايام الوسوسة
وكم هي قبيحة ايام الفضيلة ..
الملطخة بالدماء .. وبمنع العشق

المسكوت عنه

فلنتكلم قليلا عن المسكوت عنه .. لقد كان البعث حزبا صهريا اراد التهام المجتمع وصهره في بوتقته .. وويل للمارق فستنتظره اشياء كثيرة تبدأ ولا تبتدأ بناظم كزار وقصر النهاية وجهاز حنين الى اخره او مطاردته في لقمة عيشه بأفضل الاحوال .. ولكن هل البعث انتج هذه الظواهر او هو نتيجة وسبب في ان واحد .. لا يمكن لاحد ان ينكر ان البعث كان من اكثر من مثل هذه الظاهرة لاستمراره في الحكم مدة طويله و كذلك بسبب طبيعته الفاشية ولكن : اليست هذه الظاهرة تشمل معظم القوى السياسية او الايدولوجية وحتى المجتمعية العراقية والتي لايمكن اخفائها او تجميلها .. الكثيرون ممن يدعون كراهتم للبعث يسلكون مسلكه ويحاولون تصوير ان البعث مكروه لاسمه وليس لمنهجه وسلوكياته .. اما ان الاوان لنعترف ان كل هذه الجماعات ومنتجاتها تنهل من مورد واحد وان اختلفت المشارب وان مكافحة هذه الظواهر ليس بمكافحة البعث فقط وانما البحث في سبب هذه الظاهرة والسبب الذي يجعلنا نعاني انفصاما شخصيا فنسلك سلوكا "بعثيا " ونمجده فقط لانه لم يقرن باسم البعث ؟
ملاحظة ارجوا ان يكون نقاشا موضوعيا هادئا بلا تشنج او شعارات او شتائم لاننا فعلا في محنة ونريد الخروج منها على مستوى المجتمع