اشكالية الغنيمة

هنالك موضوع مهم ، له ارتباط كبير بالتكرار القاتل ، الا وهو مفهوم الغنيمة ، التي تتخذ صور شتى عبر تاريخنا . هذا المفهوم البدوي الذي جعل من الاستحواذ بالقوة او بالايديولوجيا على الثروة والسلطة والمكانة والوجاهة محورا للسلوك الاجتماعي ..دائما ما يرافق الوصول الى السلطة تمتع الجماعة بالثروة كغنيمة لها بحجة انها جاهدت او كافحت وعلى الشعب ان يسكت فالغنيمة لمن اصابها . ان هذا المفهوم العصبوي قد منع كثيرا تكون الحس الاجتماعي وافرز مفاهيم قاتلة مضرة لبناء الدولة الامة ومنع انتاج افكار مجتمعية غير فئوية لبناء امة حقيقية رغم ما تتمتع به بلداننا من ثروات وعقول كبيرة فيكون الديماغوجي هو القائد دائما مقابل القطيع الذي عليه التصفيق فقط .. هل هذا هو سر دوراننا في ذات الحلقة المفرغة ؟ ربما وبانتظار ارائكن وارائكم لالقاء مزيد من الضوء على هذه العتمة

لشوكت

كلي لشوكت نايم عله الظيم
شنو من بنج هاذه اللي تلهمه
مو صار الذبح والدم للرجاب
عود ابجلمه ينهض من تشيمه
مو حتى الضوه انباك من العيون
والاطفال بس شافت الظلمه
والاحلام هل صارت كوابيس
وما ظل من حلمنه فقط رسمه
كافي تنخدع باقوال الانذال
واحكم علفعل منه تفهمه
اترك هلحجي .. جا وين فرعون
كلها تموت منهو الخلد جسمه
جذبه وعبروها اهل الملايين
حتى تخدرك وتقبل القسمه
القسمه انت التسويها يحباب
بس تفهم عدوك شنهي فلمه

جواد ابو البدل والسميجيه

كان جواد ابو البدل الله يرحمه من مجانين الشطرة بس ماله اذيه على احد .. بس كلمة بدل تثير اعصابه وليش ما ادري .. انتو تعرفون احنه شعوب تخبل الصاحي فكان المسكين وين ما يروح ايصيحون وراه : بدل .. بدل . عندما يسمع هذه الكلمة يسرع في مشيه الى ان يركض بعدين .. يوم من الايام تحاشمت عليه الناس كلما يطلع من شارع يصيحون بدل الى ان تعب من الركض وتناوشله طابوكه سميجية معدله وتناوش بيها واحد وخله دمه يسيل .. كول ما علينه اشتكو عيه وجابوه للحاكم ، سأله .. شسمك فقال جواد صلي على نبيك .. كول صله الحاكم .. شسمك كاله صلي على نبيك .. بالثالثه انزعج الحاكم وصرخ بيه .. هاي شنو انته مخبل ؟ كاله نعم اني مخبل .. انته حاكم وعاقل وما تحملت ثلاث مرات الصلاه علنبي وانه مخبل وكلها اتصيح وراي بدل .. جزعت تناوشتلي طابوكه وصكيته بيها .. عاد يعمي انتو السياسيين راح تخبلون الشعب العراقي تره هي بس شعره وراح تنكطع وتشتغل السميجيات .. عمي نصيحه لوجه الله اعدلو ارواحكم قبل ما تنقطع هاي الشعره وما تدرون السميجيات امنين تجي احلفلكم بسنون النايبه العلواني وانه ما احلف بسنونه جذب .. اودعناكم